Ogen : Mazmur 126:3
Thema :
Bahanlah kebaktin Keluarga
Bimbingan
Menurut Marie Clair Barth & B.A.Pareira, Tafsiren Alkitab Mazmur Pasal 73-150, Mazmur 126 enda eme Mazmur ziarah. Latar belakang Masmur enda eme ija umat Israel mbaru mulih I pembuangen Babel nari (tahun 538 sM). Selaku bangsa simbaru mulih, enggo pasti keberadan umat enda labo kal bagi ukur, mbue jumpa kesusahen. Bagin pertama, ayat 1-3, bangsa Israel nginget kemulihenna ku Yerusalem she kal ruahna ukurna. Pembebasen e igambarken bagi ernipi, ertina diluar perkiran ras lebih asa siniarapken. Tapi keadan I Yerusalem ntah pe kuta kemulihenna la bagi ukur, mengecewaken (Bd. Ezra 4; Hagai 1:6; Nehemia 1:3; 4. Emaka bagin kedua, ayat 4-6, bangsa Israel nehken pertoton gelah Tuhan nehken kuasana memulihken keadan, khususna mereken ulih juma simelimpah. Terjemahen bahasa Karo ayat 4 berbeda ras terjemahen bahasa Indonesia. Karo: O TUHAN baba kami mulih ku negeri kami, desken lau udan si maler i bas baluren lau si enggo kerah. Sedang Bahasa Indonesia: Pulihkanlah keadaan kami, ya TUHAN, seperti memulihkan batang air kering di Tanah Negeb. Erpalasken terjemahen bahasa Indonesia, teridah ije kerna pengharapen bangsa enda gelah tole Dibata “memulihkan keadaan” umatNya. “Pemulihan” asalna ibas kata “pulih” artina mulihken ku keadan atau kondisi nyaman, enak, mehuli bagi si enggona. Marenda keadaen mehuli, genduari lang. Emaka gelah mulihken mehuli perlu pemulihen. Pemulihen sinimaksud tentuna labo saja masalah rohani, tapi pe jasmani. Ertina pemulihen enda pe berhubungen ras kesejahteran[1].
Adi tote sigargari ayat 1, “Kenca ibaba TUHAN kita mulih ku Jerusalem, bali kita ras kalak si ernipi”, ije teridah lit penekanen maka Yerusalem eme sada ingan (1) si enggo ijanjiken Dibata; (2) ija rumah pertoton kalak Jahudi, ntah pe ija Dibata ringan. Mulihken ku Yerusalem berarti mulih ku ingan ija Dibata ringan. Ija Dibata ringan berarti ije lit (1) dame, (2) keriahen, (3) kemalemen ate, (4) pasu-pasu.
Arah penjelasen enda, ayat 3 “Tuhu ilakoken TUHAN perbahanen si mbelin man banta; seh kal ateta malemna”, eme bernuansa pengapul, pergegeh segelah ula putus pengharapen. Segelah tetap erkemalangen man Dibata. Payo ibas geluh enda, erkiniteken pe kita, labo kepe lit si steril ibas perbeben ntah pe persoalen nggeluh. Ibas si e banci kita lemah, banci ndabuh kubas dosa. Adi bage uga solusina? Arah Mazmur 126 enda, perlu ke pe rusur nginget perbahanen Dibata ibas geluhta, jenari isehken pertotonta mindo pemulihen ibas Dibata nari.
Adi bage kai hubungen perikopta sendah ras thema PA Mamre berngi enda? Thema: Bahanlah kebaktin keluarga? Secara gamblang, labo lit kel hubungenna. Saja adi sirenungken bages-bages banci sihubungken. Pertama, meriahkal akap bangsa Israel mulih ku Yerusalem. Ndai nggo ijelasken maka Yerusalem eme ingan rumah pertoton. Ibas rumah pertoton ipahami Dibata ringan. Janah ija Dibata ringan ije lit keriahen, dame, ras pasu-pasu. Ijenda siperlu sigarisbawahi eme “ija Dibata ringan”. Adi ibas pusuh Dibata ringan pasti lit dame, lit keriahen. Bagepe adi ibas jabu ringan Dibata enggo pasti jabu e jabu siharmonis, jabu singasup ersaksi kerna simehuli ibas tengah-tengah doni enda. Adi bage kerina jabu perlu erbahan kebaktin keluarga sebab Dibata nggit ringan I tengah-tengah jabu adi ia isembah, imuliaken ibas jabu e. Sipeduaken, bagi enggo isingetken kerna ayat 3. Ayat enda eme sada pengakun labo terjeng babah, tapi pengakun si lahir erpalasken pengalamen. Enggo ialami umat Israel uga Dibata mulahi ia ibas pembuangen Babel nari. Emaka ibas konteks jumpa la bagi ukur, ayat enda bernuansa pengapul, persinget maka Dibata perkeleng kap, ras ngasup mulahi ntahpe memulihken keadan si la bagi ukur e. Bagem, alu erbahan kebaktin keluarga, kita terus ipersingeti, ipegegehi maka Dibata si sembah kita ngasup mereken kerina kai siiperluken kita. Adi jumpa la bagi ukur, tek kita Dibata ngasup memulihken keadanta.
Engkai maka penekanen “kebaktin Keluarga”? Sebab keluarga eme asal ntah mulaina lit masyarakat. Bangsa Israel lit arah keluarga si idilo eme Abraham. Emaka peranan keluarga penting ibas membentuk masyarakat. Eme sebabna engkai maka orang tua israel itekenken kal gelah ngajari anak-anakna kerna Dibata, kerna sejarah perbahanen Dibata nandangi nini-nini bangsa Israel. Alu kata sideban, orang tua arah keluarga ibereken Dibata tanggungjawab guna membentuk generasi penerus si erkiniteken, generasi si erkemalangen man Dibata. Emaka ibas jemanta pe gundari enda ipersingeti kerna tugas ras tanggungjawab orang tua, khususna mamre segelah mpersiapken anak-anakna jadi generasi si erkemalangen man Dibata. Salah sada cara si efektif eme erbahan kebaktin keluarga. Sebab bagi si ikataken Andar Ismail, “ibadah dalam keluarga berperan penting dalam proses pembentukan iman, nilai-nilai hidup, kepribadian dan prilaku[2]”.
Persoalenna eme, enggome kerina keluarga anggota GBKP erbahan kebaktin keluarga? Kuakap lenga bo. Bahken mungkin secara umum keluarga kristen GBKP lenga erbahan kebakatian keluarga. Engkai maka bage? Jababna mbue, antara lain:
1) kurang pengangkan maka mbelin ulihna man keluarga adi erbahan kebaktian keluarga. Ulihna eme:
a. lit keriahen, dame, semangat ibas ndalani kegeluhen, pendahin,
b. hubungen suami istri reh harmonisna, reh ngasupna njagai kebadian rumah tangga,
c. anak-anak bertumbuh ibas kiniteken sierbahansa ia nggeluh megiken ajar, tertib, disiplin, ras berhasil (bd.Mazmur 1);
2) kurangna kemampuan orang tua erbahan kebaktin keluarga;
3) erkiteken perbapan/mamre kurang aktif. Sebabna mbue, antara lain: terlalu mementingken erdahin ndarami erta she maka kurang lit waktu, tuntuten dahin si erbahansa melawen mulih, rsd.
Ibas erbahan kebaktin keluarga, piga-piga hal perlu siperdiateken segelah tersehi maksud erbahan kebaktian keluarga e.
1) orang tua arus konsisten nggeluh sue ras kata Dibata;
2) menyesuaiken gedang ntah gendekna ibadah keluarga e;
3) ula terlalu kaku. Terlebih adi anakta kitik denga. Nina Andar Ismael, simehulina eme ibas suasana wajar sue ras keadan rumah tangga masing-masing[3]. Sebab bagi si isingetken Andar Ismael ibas bukuna “Selamat Berbakti”, lit ka kepe bahayana erbahan kebaktin keluarga. Plus minusna erbahan kebaktin keluarga nina, anak kecil yang mengikuti ibadah keluarga dapat bertumbuh menjadi orang dewasa yang beriman atau sebaliknya ia menjauh dari Tuhan. Engkai maka lit minusna? Nina Andar, adi orang tua la nggeluh sue ras kata Dibata si ioge ibas setiap kebaktin keluarga banci jadi batu antuken man anak. Icontohkenna bagenda. Seorang anak mendengar ayahnya membaca Alkitab tentang sifat Tuhan yang adil. Tetapi anak itu tahu betul bahwa ayahnya selalu bersikap pilih kasih atau diskriminatif. Kakak-kakaknya selalu diberi kemudahan dan mereka tidak pernah dihukum meskipun bersalah. Akibatnya anak ini merasa bingung tentang sifat Tuhan, lalu dalam perkembangan waktu ia mempunyai konsep bahwa Tuhan itu sama seperti ayahnya yaitu bersikap diskriminatif. Kakak-kakaknya selalu diberi kemudahan dan mereka tidak pernah dihukum meskipun bersalah. Akibatnya anak ini merasa bingung tentang sifat Tuhan, lalu dalam perkembangan waktu ia mempunyai konsep bahwa Tuhan itu sama seperti ayahnya yaitu bersifat diskriminatif.
Jatiwaringin-Pondok Gede, 15 Nopember 2010
Pdt.S.Brahmana
------------------------------------
[1] Karya keselamatan Allah itu bukan hanya mencakup hal-hal rohani saja ataupun hal-hal jasmani saja. Namun karya keselamatan Allah diatas salib itu utuh jasmani dan rohani. Kita sebagai orang-orang yang ditebus oleh darahNya kita mempunyai hak penuh untuk menerima janji Allah mengenai pemulihan itu.
[2] Andar Ismail, Selamat Berbakti. Jakarta: BPK Gunung Mulia, 2003, hal.121
[3] Andar Ismail, ibid.
0 comments :
Post a Comment